पोखरा । पहिलो एसटी स्नुकर टुर्नामेन्ट आजदेखि सुरु भएको छ। प्रतियोगितामा विभिन्न समूहमा विभाजन गरी कुल ४० जना खेलाडीले प्रतिस्पर्धा गर्दैछन्।
प्रतियोगिताको उद्घाटन आज समाजसेवी कुशल थापाले गर्ने कार्यक्रम रहेको आयोजकले जनाएको छ। प्रतियोगिताको सञ्चालन तथा व्यवस्थापन सन्तोष रानाले गरिरहेका छन्।
उद्घाटनका अवसरमा बोल्दै सञ्चालक सन्तोष रानाले स्नुकर खेलको विकास र स्थानीय प्रतिभालाई अवसर दिने उद्देश्यले प्रतियोगिता आयोजना गरिएको बताए। “स्नुकर खेलप्रति युवाहरूको आकर्षण बढ्दै गएको छ। नयाँ खेलाडीलाई आफ्नो क्षमता प्रदर्शन गर्ने अवसर प्रदान गर्न यो प्रतियोगिता आयोजना गरेका हौँ,” रानाले भने।
त्यस्तै, प्रमुख अतिथि तथा समाजसेवी कुशल थापाले प्रतियोगिताले खेलाडीमा प्रतिस्पर्धात्मक भावना विकास गर्नुका साथै स्नुकर खेलको प्रवर्द्धनमा योगदान पुग्ने विश्वास व्यक्त गरे। “खेलकुदले अनुशासन, धैर्य र आत्मविश्वास विकास गर्छ। स्नुकर खेललाई पनि अन्य खेलसरह प्रोत्साहन र अवसर दिन आवश्यक छ,” थापाले बताए।
प्रतियोगितामा पोल ए, बी, सी र डी गरी चार समूहमा खेलाडीहरूलाई विभाजन गरिएको छ। आयोजकका अनुसार प्रतियोगितामा सहभागी खेलाडीहरूले उपाधिका लागि प्रतिस्पर्धा गर्नेछन्।
आयोजक रानाले प्रतियोगितालाई आगामी दिनमा अझ व्यवस्थित र ठूलो स्तरमा सञ्चालन गर्ने लक्ष्य रहेको समेत बताए। “यो पहिलो प्रयास हो। खेलाडी, दर्शक र शुभेच्छुकबाट प्राप्त सहयोग र उत्साहले आगामी संस्करण अझ राम्रो बनाउन प्रेरणा मिल्नेछ,” उनले भने।
